第八天
2005年7月2日（六）
天氣：雨

瑞士 - 勞特布魯嫩 > 少女峰 > Grutschalp > 琉森 (卡貝爾橋，石獅紀念碑)

　　今日的節目本來是去玩降傘飛行（Tandem Paragliding）， 已問好Hostel的職員可以代為安排，只要在當天早上08:30前通知他們就成了．今早雖然沒有下雨，但天色仍然陰霾，似乎仍然不是上少女峰的好日子．因為阿比在上次的歐洲之旅已有到過少女峰，而我仍是想一到Top of Europe！我們於是決定分頭行事，阿比照舊去玩Tandem Paragliding，我就獨上少女峰．大家約定中午過後在Hostel會合，然後出發去琉森．

　　怱怱留下大背囊給阿比，我就趕去車站想買good morning ticket上少女峰．卻被售票員告知，如持有Eurailpass可享有75折優惠．折扣後來回少女峰的車費（chf 116）會比good morning ticket (chf 130) 更為便宜，更可不受限制要在中午前下山呢！不過，由於時間關係，我仍是坐上第一班列車去Kleine Scheidegg．對於小妹來說，孤身上路時最幸苦的一件事，就是要強打精神不要在車中入睡．幸好在Kleine Scheidegg轉上的登山鐵路裡，遇上三個友善的澳洲仔可以一同聊天．

　　終於如願來到少女峰（Jungfraujoch），迎接我到來是撲面的飛雪！隨便地跟著一群日本人走，原來他們是要去玩adventure route．當他們和教練在出口處換上武裝時，我貪玩的試行出去雪路．怎知我行得太側了，沒行得幾步，雪深已及小腿，只好乖乖的去「冰宮」參觀好了！然後想去看「冰河」，以當日的天氣，我當然是甚麼都看不到啦．回到室內地方取暖時，發現自己心跳加速及有點氣喘，那應就是高山反應吧？！只得放慢腳步去玩那部“明信片影相機”，一張postcard要chf 5是有點少貴啦．不過當蓋上“Jungfraujoch Top of Europe 3454M”印章寄回給自己，亦不失為一份特別的紀念品！

　　不經不覺在山頂已兩小時，是時候下山了，預計在12:35會回到Lauterbrunnen．一上車即拿出手電查看阿比有否傳來訊息，卻未能接收到網絡．直至回到Kleine Scheidegg轉車時才看到阿比的sms．原來她要到12:50才會與Tandem Paragliding的教練集合呢！即時回覆要她12:30後在Lauterbrunnen車站接我，那麼我就可以看她如何玩Tandem Paragliding了！至於阿比玩Tandem Paragliding的過程，就留待她自己說吧．如果再有機會，小妹亦很想一試在空中飛翔呢！

‾See me fly, I'm proud to fly up high∼

　　今夜要入住的Backpacker Lucerne要求在17:00前re-confirm booking，因知道它和Valley Hostel是同屬於Swiss Backpacker 集團 的．經查問後，原來我們是可以在Valley Hostel付清Backpacker Lucerne的宿費，那麼就不用怕下到琉森時會太晚了．在Baggages Room取回行李後，我們就坐上著名的觀光列車Golden Pass前往琉森．Golden Pass果然名不虛傳，車窗外的每一格景色己是一幅美麗的風景畫了！

　　約六時下到琉森 (Luzern)，Backpacker Lucerne的位置離車站有點遠，加上問路的時間，我們要用上30分鐘才到達．還好它的環境不俗，房間是細小了一點，但common area裝潢得很有活力感．

　　趕在日落之前，我們急急腳地完成了琉森兩個最著名的景點：卡貝爾橋（Chapel Bridge）及石獅紀念碑（Lion Monument）後，轉眼又到晚上九時了．街上的商店全已關門，食肆亦不多見．我們已作好最壞的打算，要拿出最後的兩包即食麵作晚餐了．幸好後來在車站的地下商店街找上一間24小時營業的supermarket，我們可以在內買下今明的早晚餐．又想到明天是星期日，恐怕在St. Moritz（我們在瑞士的最後一站）的商店都會休息了，所以亦在supermarket內買下所需的瑞士朱古力手信．

　

阿比的話

　　今日同小妹分道揚鑣．吃過早餐後，向Hostel職員查詢有關Tandem Paragliding的事宜，答覆係12:50先有位去玩．問過全程由pick-up到landing只不過一個小時多些，可以趕得切15:00離開Lauterbrunnen去琉森．於是決定去試吓由800M飛落ｏ黎ｏ既感覺啦．然後send SMS俾小妹告之我ｏ既情況．

　　由於時間尚早，於是乎一個人攞住相機，四周逛逛．不受時間限制，漫無目的咁慢慢欣賞Lauterbrunnen，又別有一番感覺．其間見到一個個降傘落在地上，真係好期望好興奮呀！唔知自己一陣玩ｏ既時候，會係點呢？

　　接到小妹回覆話想睇我飛，於是在Lauterbrunnen車站匯合小妹，跟住一齊走到去Murren的纜車站等教練．原來同我同一時間玩ｏ既仲有一個澳洲男孩，於是兩個教練（一個高大，一個較為靚仔．）加上澳洲男孩，我及陪玩的小妹．一行五人，乘搭纜車到達Gruschalp（纜車要自費）．出站後，還要大慨行10-15 mins上去山坡．那個山坡都幾斜，連一向運動開o既我都有點索氣．（小妹按：我扯晒蝦添呀．）教練還要揹住個好重的背囊，內裡是所有的降傘器材，真係辛苦錢ｏ黎ｏ架．小妹亦唔話得，佢唔玩，但要倍我一齊行上山坡，又要幫我拍埋movie，然後仲要一個人落番山添．（在此特別謝過小妹．）

　　初時在車站已經安排好我會與高大的那個教練一齊飛，但因為我同小妹行得慢，而靚仔教練一直行最尾．結果…我可以獻出第一次“飛”比靚仔教練．教練先張降傘鋪平在草地上，然後為我帶上安全帶之後．教我在一開始時要快步行，但不要坐在軟墊上先．跟住佢自己亦上好鎖後，當然要影番張起飛前既相啦！

　　準備……1∼2∼3！起初快步咁走，唔知係咪我輕得濟？好快雙腳已經自然離地．而且當日順風，好快已經離開剛才辛苦行完的斜坡．一飛出去，簡直唔知點形容！真係覺得自己似隻雀仔．可能由於我玩慣攀石，又唔覺得驚同高．只係覺得自己可以兩脚Fing Fing ，望住腳下細小的獨立屋．果種感覺，真係要試過先知．飛了一分鐘後，先至記得我有攞相機．於是乎立刻攞起相機四圍影．當教練覺得個傘夠穩定後，就開始幫我們影相．他一手攞住支有伸縮性的鐵竿影相（竿尾有影相機），一手穩定個傘．我真係忙過不了，又要自已影景，又要睇同風景，又要按教練指示笑o黎影相．

　　差不多飛o左5分鐘後，就見到位於Lauterbrunnen內的大瀑布．可以近距離接近咁大嘅瀑布，我諗都係只有飛先可以做得到．再加上遠處雪山景色，真係一絕！Landing的地方係大瀑布隔離的草地，到ｏ左瀑布後，教練一跲圍住瀑布飛，一路幫我影相．跟著佢問我旋轉快Ｄ，可唔可以？一向追求刺激ｏ既我，點會放過咁難得ｏ既機會，當然答“YES”啦．跟住教練用spin方式，飛得比之前快，而且我開始覺得似玩海盜船．有離心力，我興奮到WAWA叫出o黎！跟往離地不遠時，開始減速，然後慢慢、安全、順利地降落在草地．我降落後，澳洲仔随後降落，從他的臉部表情得知，大家都好開心．我地見面時，更大叫Great！Excellent！

　　之後與教練合照後，佢取出之前同學生所影的相簿sample，問我要唔要番Ｄ底片？人一世，物一世．第一次飛，當然要啦，誠為CHF25．由於我諗住飛，所以除o左相機及飛的費用，其它的都俾晒小妹keep．最後教練話只要將底片的費用入落信封，然後交俾Valley Hostel職員，就可以了．而我就攞住張certificate及底片慢慢行回纜車站等小妹．

　　攞回行李後，乘搭Golden Pass由Interlaken前往琉森．坐在頭等透明車卡內．全部景美盡收眼底．但我就覺得下次我會選擇琉森→Interlaken，因為越接近琉森風景越靚．

　

飲食

早餐：福字米粉，腸仔( chf 1.33)， 鮮奶
午餐：自製 - 蒜味芝士醬+火腿三文治 (chf 5.5 for 2 persons)
晚餐：自煮 - 煎雞搥，蕃茄意大利雲吞，Tiramisu (chf 18.8 for 2 persons)
其它：Ice Lemon Tea (chf 2.5/1 litre)，Lemon Coke Light (chf 1.5/500ml)
雜用

Tandem Paragliding (chf 150)

交通

Lauterbrunnen>Jungfraujoch (return: chf 116)
Lauterbrunnen> Grutschalp (return: chf 11.8)
Lauterbrunnen>Interlaken (chf 5)

住宿

Backpacker Lucerne (chf 68 per double room)

＊ CHF1 : HK$6.29 (as of June 2005)

　

〔主 頁〕〔前 言〕〔行 程〕〔資 料〕〔後 記〕

<< Back            Day 01 | 02 | 03 | 04 | 05 | 06 | 07 | 08 | 09 | 10 | 11 | 12 | 13 | 14 | 15 | 16 |           Next >>