|
上次講到……… 原本無計劃五月去旅行,
突然間女友又話有假放, 仲放成10日添! 霎時間都諗唔到去邊度好 ………? 由於要由上海出發o既關係,
於是睇睇地圖同check o下d航班, 由上海直航去日本o既地方唔太多,
而且個人懶又唔想搭咁多車, 除o左東京同關西,
仲有就係福岡, 名古屋同仙台,
九州福岡去過所以暫時唔會再去,
仙台東北地方又好似唔係好o岩時候, 淨番名古屋……~ 就名古屋啦!
反正未去過, 再睇週邊地方, 有近期人氣o既飛驒高山,
仲可以去埋一直都好想去o既白川鄉添! 交通都算方便,
可能你會話去白川鄉梗係冬天落雪先去啦!
不過世事無絕對o既! 就正如以前d人話冬天去北海道最好,
但我覺得夏天仲正! 於是就咁決定! 一於 : 誓要去~......入「高山」~...... 唔識唱~...... 過千關~......
Ping! Bomb! Ping! Bomb! Ping! Bomb!...... 時間只係淨返一個月……… 我要o係最短時間去plan今次行程,
今次可謂效率高, 老細話齋, 做到o野呀! 不到一個星期已經plan好行程,
訂好機票同酒店, 期間雖然都有d阻滯, 因為正值係五一假期,
又係日本o既「黃金週」, 機票同酒店都非常緊張,
左就右就總算順利攪定, 仲等咩呀! 等出發囉!
Ping! Bomb! Ping! Bomb! Ping! Bomb!...... 以下o既事發生o係5月3號下午5點至6點之間…… 話咁快又到o左出發o既日子,
懷著輕鬆o既心情o黎到浦東機場, o係counter check-in 已經feel到不妙,
話我地坐果班機要delay一個鐘, 5點幾機已經係夜機啦, 去到都9點幾,
依家仲要delay一個鐘添! 真係激死人! 不過反正都預o左唔見一日,
遲一個鐘同早一個鐘都無咩分別! 仲有咁多時間去邊呢?
浦東機場又無咩野好行, 於是就入o左lounge 坐等上機, 一直都留意o住電視,
但係都無我地果班機o既資料, 初時以為未update o既o者!
你知大陸d野嫁啦! 丫! 點知一係唔出, 一出就話取消喎! 唔係呀化!
於是就去問櫃檯d職員, 佢地check o左一輪都話唔清楚,
又叫我地等, 又叫我地自己去問airline職員, 心諗唔係喇!
去閘口睇睇穩鎮d喇! 唔出去由自可,
一出去迎面有個航空公司職員大大聲咁唔知講d咩野,
見佢後面仲有幾個日本人跟o住, 好似搵緊人咁,
因為佢係用日文, 起初都無留意, 直到佢講o左一個好重要o既字,
呢個時候我學o左好o耐o既日文終於用得著喇! 就係「NAGOYA」喇!
(其實名古屋o既英文同日文有咩分別?)
於是我地就即刻上前相認啦! 但係個職員只係叫我地跟o住佢,
其他就咩都無講, 初時以為帶我地去另一個閘口搭第二班機啦!
點知見佢越行越出, 一直去到海關閘口, 跟住叫我地出返去check-in
counter挪返件行李, 另一個職員就話今天可能〝走不了〞喇!
我再一次講唔係呀化! 出到counter只見一地都係行李,
慘不忍睹! 跟o住有位職員就對我地同d日本人講,
挪返自己o既行李, 預備上車去酒店, 我當堂暈o左咁滯!
去乜鬼酒店! 我地住o係度嫁! 返屋企唔好! 係呢個時候靈光一閃, 記得差唔多時間仲有另外一班MU o既機都係去名古屋o既, 而且JL同MU都係同一個group, 所以就問個職員可唔可以轉過去, 初時佢就依依哦哦! 跟o住有個相信係話得事o既男職員就過o黎細細聲同我地講, 叫我地細聲d去隔離個counter, 問我地幾多個人, 話按排我地坐另外果班機, 跟o住就叫o左一位職員帶我地過去……
Ping! Bomb! Ping! Bomb! Ping! Bomb!...... 時間只係淨返半小時……
二話不說就梗係let’s
go啦! 急急腳去到MU counter, 好彩仲趕得切, 而且仲upgrade o左坐business
class添! 有理無理塞o左兩舊行李比佢霸o住個位先! 挪埋張boarding
pass總算鬆一口氣! 原來我地check-in完後只係淨返3個位,
多幾個都攪唔o店! 走之前見d同機o既日本人仲笑笑口乖乖地聽佢地講上車去酒店,
不過梗係啦! 佢地留多一日當放多一日假, 仲有免費酒店住,
但我地唔係喎! 唔只唔見一日假期, 仲唔見一日酒店錢添!
打死都唔留低啦! 終於到達名古屋機場,
比預期遲o左半個鐘, 個天固之然係黑啦! 不過點都好過遲一日嘛! 聽聞呢個機場用埋今年就唔用喇!
會有個新o既o係遠d o既地方, 所以今次雖然係第一次o黎,
不過亦可能係最後一次o黎喇! 唔緊要, 我對呢個機場感覺麻麻地, d人搭車唔係好守秩序!
天都黑喇!
第一時間就梗係去酒店check-in先啦!
【第二日】 一早就o黎到呢度叫OASIS
21 o既地方, 話一早其實都成10點.
OASIS
21 呢座o野比我想像中差d, 都係有一般skylight o既問題,
就係清潔喇!
食完早餐同比卡超玩完之後
呢度鬼影都無個,
只有小貓三幾隻! 原本諗o住行完公園就順路入埋｢名古屋城｣啦!
丫! 點知原來後面無門口可以入去,
要入就要兜返去前面咁吹漲! 結果嬲嬲地中途閃o左! 邊個設計嫁?
送貨o黎點攪? 又行正門呀! 失禮死人喇!
閃o左o黎到JR
CENTRAL TOWER o既商場行街, 正所謂商場如戰場,
無氣無力點作戰呀! 食個lunch先穩陣. 試o左呢個名古屋五大名物之一｢味噌豬扒飯｣
【第三日】 o係名古屋留o左兩日(其實係得一日),
今日我地就起程去飛驒高山, 呢程車費認真喇利!
成六千幾yen! 唔只喇利!
呢班車仲好攪野, 我稱佢為『古惑之車』, 同國產零零漆o既古惑之鎗係齊名o既!
事原其實係自己扮醒目之過, 上車坐低都無咩野,
直到開車發覺架車係倒後行, 但座位係反方向,
於是我就懶醒目咁將個座位拎轉, 仲將對o住我地果張都拎埋添!
但見其他人都無乜反應, 以為佢地懶唔願o郁o者! 點知去到岐阜站之後,
架車又向反前行喎! 心諗唔係咁攪野呀化!
幾時又會向反後呀?? 如是這過o左一兩個站, 都係唔對路, 於是問o下隔離果位日本人, 問佢跟o住會唔會再轉反過o黎, 好可惜佢話唔會, 於是我唯有死死地氣拎返個座位返轉頭, 真係畀佢吹乒乓!
今日天氣唔算好晴朗, 但勝在唔曬, 涼涼地好舒服!
SARUBOBO都o黎呢度拜神!
仲係遠道由白川鄉o黎添!
真係神心!
我地過兩日去探你o下!
因為唔係節日o既關係,
要入去呢度先睇到d屋台, d屋台都幾靚. 有d仲好耐歷史添!
呢架聽講係最舊,
叫MIKOSHI. 而且同其他唔同, 係無轆o既, 唔怪得要擺o係度啦!
抬出去遊都幾係! 果d屋台平時就係收埋o係d白色屋入面,
無啦啦行過又有一間, o係屋企隔離可能又有一間, 好似7仔咁,
梗有一間o係左近! 好攪o野! 好似d卡通片d秘密基地咁,
必要o既時候就會打開機關走出o黎, 唔知d idea係咪咁o黎o既呢? 係都唔奇, 你睇高達o既造型就知, 都係根據一d傳統o既o野再modify.
o係櫻山都攪o左成朝, o黎到上三之町又肚餓喇! 於是就入o左呢間叫｢飛驒路｣o既餐廳食o野, 當然要試o下呢度o既名物朴葉味噌加飛驒牛肉啦! 味道唔錯, 有個爐仔燒o下燒o下熱辣辣咁!
呢度就係上三之町喇!
雖然依家只係下午5點, 但係d舖頭已經閂晒門,
鬼影都無隻! 真係離晒譜!
你咪睇佢黑黑實實,
睇落都幾有格調嫁! 門口果粒唔知係乜o野?
不過如果門口有果粒o野即係代表呢間係酒廠, 知無? 之前講過話無人就出事, 就係因為放完假過完節, 無人無遊客, 所以好多餐廳都好早閂門, 一係就索性休息, d人好似唔駛做咁! 攪到我地搵唔到地方食飯! 最後搵到間居酒屋借酒澆愁!
【第四日】 行完一日高山,
今日就出發去附近一個叫古川o既地方,
o係高山站坐火車大約15分鐘就到. 相對於高山,
古川就細好多, 雖然高山都唔算好大, 景點只係集中o係車站附近,
而且唔多!
顧名思義古川即係古老o既河川, 因為呢度有條好舊o既川叫瀨戶川, 而且呢度大部分建築都保留o住以前o既風格, 仲有d叫做｢雲｣ o既建築特色, 仲要係個個唔同樣, 好似以前d家族徽號咁.
見唔見果d「雲」呀? 真係個個唔同樣, 攪到我有d暈!
呢位大叔正在講解呢度d建築特色畀我地知, 仲有d遊戲示範果d結構, 拆散o左叫我地砌返埋, 有d都幾複雜o下!
估唔到呢個時候仲有紅葉睇, 唔怪得之前有人同我講過紅葉同櫻花係有機會同時出現, 我屋企有個清水燒個圖案就係咁喇! 初時都覺得好奇怪, 跟o住個sales同我講係有咁o既機會, 而且仲有特別o既含意, 不過佢無講個含意係咩?
跟o住o黎到呢度可以話係古川最有代表性o既景點,
瀨戶川同白壁藏造,
水入面有好多錦鯉, 而且好大條,
間唔中會跳跳o下, 唔好行咁埋, 小心佢咬你!
之前聽朋友講話遊古川,
一兩粒鐘夠晒, 但我地就攪o左成大半日, 仲miss o左班火車攪到要補錢坐特急添!
唔緊要啦! 咪由佢走囉! 咁至係旅行嘛!
La! 無講錯呀! 真係紅葉同櫻花同時出現呀!
經過尋日o既教訓,
今日唔諗咁多, 返酒店搵食, 今餐都唔錯, 當然唔少得o既飛驒牛肉啦!
食飽飽早d休息, 聽日一早要出發去白川鄉.
【第五日】 今日一早要起程去白川鄉,
由高山坐｢濃飛巴士｣, 大約兩個鐘頭就到,
雖然成兩個鐘頭, 不過沿途風景唔錯, 會經過庄川,
果度有兩棵好大好出名o既櫻花, 依家時間唔o岩, 淨係得d框,
仲會經過御母衣湖, 大家跟我讀一次! 御母…
係咪好難讀呢? 唔經唔覺好快就到喇! 不過唔知點解去白川鄉果d多數都係老人家!
唔通………
話咁快就到喇!
白川鄉有兩個觀光案內所, 一間o係巴士停o既地方, 即係せせらぎ公園, 另一間就o係村入面, 約人等唔好攪錯呀!
呢條係庄川,
唔知水入面係咪有d咩礦物質, 令到d河水有種淡淡o既綠色,
感覺好清爽! 時間尚早,
仲未可以check-in, 四周圍行o下先,
隔離果間係明善寺鄉土館,
入去參觀要收300yen, 都幾好搵,
佢地咩都唔駛做淨係收錢,
半個鐘頭內我見都有十幾二十人入去參觀, 算啦!
鬼叫你無間幾百年o既舊屋咩! 除o左旅遊業, 佢地有時間都會耕o下田嫁! 仲會養蠶取絲, 認真懷舊!
行到無力就食d野先!
o係日本o既坑渠蓋通常都會有d代表當地o既圖案,
呢度都唔例外.
行行就o黎到今晚住o既旅館, 叫「孫右エ門」
Check-in完時間尚早,
繼續四周圍行o下.
今日天氣確實非常好, 淨係睇相同睇字都好難形容畀你知當時果種舒適同暢快o既感覺, 清風送爽, 流水淙淙, 綠葉清翠…… 一句講晒 : 施服! 由和田家旁邊一條小路行大約15分鐘,
就可以上到狄町展望台睇晒成個白川鄉,
不過沿途好多蚊之仔好鬼煩!
冬天落雪時候有機會積雪上唔到! 注意! 注意!
上到o黎反而睇得唔係咁清楚,
正所謂黃昏時候有煙霞就係咁解喇! 本來想等埋日落先走, 點知等極佢都唔落, 佢唔落唯有我地落啦! 因為夠鐘返去食晚飯喇!
返到旅館見佢地已經開始預備今晚o既晚餐喇! 中間o既火爐都係呢d旅館o既特色之一,
冬天o既時候, 相信又別有一番風味! 初時以為呢d民宿o既晚餐多數都係麻麻地,
鄉土料理嘛! 唔好期望咁高, 點知出奇地好食喎!
雖然唔算係d咩名貴食物, 但味道唔錯,
比我想像中好好多, 分分鐘好過d溫泉旅館,
我仲食o左三碗飯添! 飯後果係今期人氣o既士多啤利萍果橙!
呀! 無萍果唔好意思! 食完飯,
旅館o既主人就出o黎同我地o頃o偈, 講o下呢度o既歷史同佢o既個人經歷,
唔講都唔知原來佢係白川鄉會會長, 真係失覺晒!
NHK仲有個特輯訪問過佢同介紹白川鄉添! 跟o住佢就放o左果個特輯畀我地睇, 雖然佢全程都係講日文, 但係我明呀!…… 總之我明啦! 唔好問咁多!
【第六日】 o係白川鄉過o左舒適o既一日一夜, 今朝要走喇! 返高山挪返d行李然後再返名古屋. 好快又返到高山, 因為買唔到禁煙席, 所以要坐遲一班車返名古屋, 趁仲有時間就去埋之前無去到o既景點「高山陣屋」. 「高山陣屋」即係以前o既官府,
亦係日本現存唯一一間, 梗係要去睇睇!
d沙o既圖案其實係一種花紋叫“青海波”睇落好熟口面,
好多地方都見過, 原來以前係d大官貴人先可以用呢種圗案裝飾! 參觀完陣屋買埋手信後時間o岩o岩好夠鐘走人!
坐多兩個鐘頭車又返o黎名古屋喇!
返到o黎都天黑! o岩喇!
去OASIS 21影夜景! OASIS
21夜景比日景靚, 而且地下d燈仲會變色添!
【第七日】
呢度係上海, 係呀!
係上海呀! 話咁快就返o左o黎喇! 今次旅程可謂有得有失,
真係世事無絕對, 但總算有驚無險順利完成!
除o左體會到有好多o野係你自己無法掌握之外,
亦因為今次去o既地方比較少, 步伐亦比較慢,
又唔駛趕時間, 趕搭車, 非常悠閒,
唔知係咪個人老o左呢? 開始越來越享受呢種節奏,
以後o既旅程都希望朝呢個形式, 行慢d! 睇耐d!
有咁慢得咁慢~~! 有咁慢得咁慢~~!
有咁~~ Z z z …… Z z z
…… 係!
要盡量享受o下旅行o既樂趣! 下次去邊? 未諗呀! 等我今晚諗o下先! 住宿資料 名古屋
-
東横イン名古屋錦 鳴謝 : 多謝小妹全力幫助先可以完成今次遊記, 等我地呢d無頁遊民有個棲身之所, 真係好耐都唔該!
* 灰框圖片表示可以按入放大觀看 |
Ping!
Bomb! Ping! Bomb! Ping! Bomb!......
