參觀完御所，總算了o左心事，跟o住坐巴士o黎到「真如堂」，
亦都係一度睇紅葉o既好地方，好明顯呢度d紅葉同之前果d唔同，
比較細塊同薄d，唯一相同o既係一樣咁多人。

沿「哲學之道」經過「永觀堂」，原本打算入去參觀，但係睇睇個拜觀料……    咩話! 成千yen，唔好去搶！ 係門口影張相就算，不過都有好多人照畀。

好快又o黎到「南禪寺」，點解又? 因為上次o黎過囉！不過一樣咁吸引，影櫻花係呢個位，影紅葉又係呢個位，真係吹佢唔漲！

終於可以正正經經食個午餐喇！ o黎到「南禪寺」就梗係食豆腐料理啦！ 而且都係呢間「順正」，雖然呢度唔只呢間食豆腐料理，不過食o既野大同小異，我貪佢環境清幽d，不過好多人等位，有樣野我諗唔明，佢地有d set居然有魚生o既？ 唔係食齋o既咩？

食完午餐又3點幾，跟o住就諗o住慢慢行去「清水寺」，沿途經過好多地方「元山公園」、「二年土反」、「三年土反」一邊行一邊買o下野咁，結果行到「清水寺」已經天黑，無諗過5點咁早個天就黑晒咁濟！ 仲開始有人排隊等夜間拜觀添，我地唯有又放棄走人，因為約o左網友o係大阪食飯，所以唔走唔得。 其實今日都行o左好多路，先圍繞「御所」一週，再由「真如堂」行到「清水寺」，真係腳仔軟，睇返地圖都有d驚！

終於返到大阪喇！ 今晚約o左另一位日本朋友食飯，原本諗o住去「蛸之徹」食燒墨丸，即係可以自己整果間呢！點知咁o岩今日休息，於是改o左去食O KONOMI YAKI，即係鐵板燒餅。

呢個燒餅有名堂，叫「大阪城」，認真夠晒大。

食完飯無咩世藝週圍行，撞o岩有檔煨蕃薯，係人都話日本d煨蕃薯好正，梗係要整番個啦，老闆話因為收工，所以醒多兩個我地添，今晚大鑊喇！酒店d窗唔開得o架！